|
Swyn y gân sy'n ugeinoed;
Gwenu Wil sy'n ugain oed!
Ugain oed ein geni'n un,
Ugain oed gwin ein nodyn;
Ugain haf o gân a hwyl,
O rannu ein côr annwyl;
Ugain haf o greu afiaith,
Ugain haf egnïo'n hiaith.
Llywio wna Wil yn llawen
Yr holl gôr â llaw a gwên;
Rhin a swyn y darnau sy'
Yn ei wyneb yn canu;
Arweinydd sy'n rhoi'i hunan
Y doniau i gyd yn y gân;
Rhoi ei oll i'r côr o raid,
Yn arweinydd o'r enaid.
Un o fil yw'n cyfeilydd;
Yn nawnsio hon, awen sydd;
Bysedd melfed yn rhedeg
Yn esmwyth fel tylwyth teg
Hyd y nodau yn hudol,
Hefo rhyw wefr ar eu hôl;
Mae'n rhoi â llam heini'r llaw
Ei hathrylith i'r alaw.
Ninnau'n un, canwn i Wil
Â'n canu grymus, cynnil;
Canwn nes bod acenion
Nwyf yr iaith hyd y fro hon;
Noddi'r iaith â'n hafiaith ím,
Cenhadu drwy'n cân ydym;
Y gân hoff ers ugain ha', -
Canwn, seiniwn Hosanna!
Rhys Dafis.
|
|
